و*** أمها العشرة لاف – الحلقة الثامنة

السلام عليكم و رحمة الله و بركاته

اليوم كيما تشوفوا من السلام متاعي أمي العربية غالبة. راني كنت حالّة الورقة عل الأورديناتور بش نحكي على حكاية أخرى لا علاقة بلي بش نحكيه توة. دڨني ربي و رجعت للفايسبوك نعمل في طلة ياخي لقيت مقال باللغة الفرنسية يحكي على واحد سعودي عندو برشا عشرة لافات و عندو نية باش يعمل صندوق استثمار في تونس ب50 مليار دولار و يخدم 200000 بطال تونسي.

الراجل هذا اسمو سليمان جازي الشماري و حسب المقال طالب مل الدولة بش توفرلوا الأرض بلاش و توفروا الامكانيات اللوجستية باش ينجم يستثمر. فما حاجات أخرى يحكي عليها المقال أما حاجات فنية متاع نخبة و أنا توة طالعلي الدم خمسة ميات مليون عل النخبة متاع *** و لذا موش بش ندخل في التفاصيل.

هيا سي سليمان قالك اللي الصندوق هذا ناوي يعمل زوز سكك حديدية وحدة تشق تونس مل الشمال للجنوب و لخرى تشقها مل الشرق للغرب و يحبوا زادة يعملوا منطقة صناعية في سيدي بوزيد و ينميووا السياحة الصحراوية. بالطبيعة باش اللي يقرى ما يقومش يشطح بزوز محارم، الحكاية ماهي إلا نوايا و مزال ما فما منها شي عمليا. أما النية موجودة.

هيا أنا نقرى و فرحتي عارمة. مركزة عل 200 ألف موطن شغل و عينايا قريب تزغلل بالدموع. بديت نقول لروحي أهوكا فما امكانية لحل مشكل البطالة و اللي حتى لوكان تظهرلنا الحكاية صعيبة و شبه مستحيلة فما حاجات تقراهم يرجعولك الأمل. كملت نقرا ياخي عثرت حافية في سطل ماء سخون. هيا سي الصحافي البارع اللي كاتب المقال، بعد ما حكى الحكاية عطف و قال : « بعد ما السعوديين شلكوا راشد الغنوشي على تصريحاتو الأخيرة في أمريكيا، بالكشي هذه محاولة من المملكة الوهابية تحب تهدّي الجو و تحب تورينا قداش انجموا نربحوا حاجات كان نكفوا عل السعودية. »

هيا بديت نفد مل الخلاصة متاع المقال و بدا يجيني الردّان كي العادة و بديت نسب في روحي إلي قريت المقال. حبيت نشوف فماشي شكون جاتو حالة التقيؤ اللي جاتني، هبطت نقرا في الكومونتارات فماشي ما نلقا شكون يسب في بلاصتي و يفرهدني. و يا خيبة المسعى. يا ليتني لا قريت و لا شفت. نلقى جماعة مل النخبة و من المجتمع المدني يعلقوا عل الحكاية و بئس التعاليق. اللي يقلك هذا نداء للصلاة و اللي يقلك هذا استثمار 100% حلال و اللي يقلك ما فماش قطوس يصطاد إل ربي.

بربي يا نخبة العار و الدمار لوكان جا صندوق الاستثمار هاذا عملتوا أمريكية و لا فرنسا و لا ألمانيا راكم هبطتوا تشتحوا بزوز محارم و لا لا ؟ راكم تشكروا في أسيادكم العجم و تشلكوا في اللي يقول لا و يحكي عل السيادة. و بالطبيعة أمريكيا و فرنسا و ألمانيا كي نبروا عليهم راهو على خاطر كي يمدوا فلوس ما يعملوش صناديق استثمار أما يعطيوا قروضات، الشعب يقعد طول عمروا يخدم على خلاصهم.

يا نخبة العار، يلي ما تعرفوا مل الفقر و الدمار كان اللي تقراوه في بحوث أسيادكم الأمريكان و في لقاءات المجتمع المدني، يلي تخدموا و تخلصوا الملاين و تعديوو عطلة الشتاء في السكي و عطلة الصيف في إيبيزا و تنبحوا مل الصباح لليل عل الاسلاميين و انتوما مشكلتكم الوحيدة كعبة البيرة اللي خايفين لا يحرموكم منها في بار و لا صاحبات بناتكم الي معاتش باش تنجموا تروحوا بيهم للدار، يلي باسبوراتكم تحت ضبابتكم و كان لازم تخليوها البلاد و تڨطعوا، يلي حتى لوكان تكلمتوا في التراكن في عهد المخلوع (هذا كان تكلمتوا) خدمتوا المنظومة متاعو و استغنيتوا منها، يلي نهار كامل و انتوما تنبروا في بيروات بالشوفاج سونترال و أكثريتكم على ضفاف البحيرة اللي بناوها سعوديين و اللي تمشيوا تعملوا فيها الشوبينق متاعكم تشريوو الروية بـ600 ألف و السروال بمليون و بعد ما تقضيوا تعملوا فطور بـ100 ألف و تحقروا السارفور في الرستورون و ما تصبحوش عل الفام دو ميناج و كي تراو وجوه ما تشبهش لوجوهكم المزبلة بالبرودوييات الي مصنوعة بفلوس مستثمرين قطريين و سعوديين تقولوا عليهم جبورة. يلي كريتوا الديار بالملاين لليبية كي هربوا مل القذافي و مل الناتو و رصاتلهم يبيعوا في ذهبهم بش يخلصوا جرد قاراج فيه ميحاض. يلي نهار كامل و انتوما تسبوا في الشعب و تقولوا عليه بهيم و ما يحبش يخدم و انتوما بنيتوا القصورات على ظهرو. يلي عملتوا الريحة، يلي عملتوا العار.

هيا يا نخبة الهانة و رقاد الجبانة، خدمهم انت الـ200 ألف بطال. برى حلوا انت صندوق الاستثمار, و ميسالش دبر راسك في دراسة سوق و لا زوز، اشري بفلوسهم كرهبة لصاحبتك و لا لصاحبك و لا شي يهمني فيك.

كان النفاق، كان الأنانية و كان البهامة. يا نخبة الهانة.

كان التنبير الفارغ.

اللي عندوا حل يتفضل و اللي ما عندوش يبلع. قعدتوا كان تنبروا بالفارغ. لا جاكم التنبير على الأرض اللي طالبينها السعوديين بلاش كيفاش و لوقتاش ؟ لا جاكم التبير على شروط الاستثمار الأجنبي. لا جاكم على قانون المالية متاع 2012. جاكم كان عل الاستثمار 100% حلال. ملا مستوى و ملا نخبة و ملا تحليل و ملا ضمار. تي روح اسكر من هنا لغدوة و البس ولا عري و لا ازنى و لا صلي و لا اعمل شي تحب. خايفين عل الحرية متاعكم تي شكون مسهالكم. نفختولنا ريوسنا بالحكايات الفارغة. هيا هاكم موش فرحانين و تغزلوا عندكم شهرين أعملوا ثورة أخرى تراه. وريونا كيفاش. أما هيهات. الثورة عملها الجيعان و المقهور و المسكين و بلاش بيه ما عندكم ما تعملوا. بلغة أخرى… ولا خلي موش وقتوا توة.

تي برّاو تفرجوا عل الفيديوات متاع قفصة و سيدي بوزيد و تالة و غيروا، لعباد رواحها باش تطلع مل الغش و القهر و الغزول، خرجوا عل الخبز و التنمية رصاتلهم يعانيوو في الحكايات الفارغة و الديمقراطية و الهوية و الحريات و العار. تي بلاهي تحكيلوا عل الحرية و كعبة البيرة اللي معاتش باش يخليوه يشربها، تي حتى يخلط يشريها هو !

و الله كنت عاملة كيف و ناوية نكتب عل التضامن و الحب و التسامح و العصافر و الطبيعة و كنت ناوية نقول إلي واحد ما يلزمش ينقم عل النخبة و اللي تطلع تهبط تقعد ديما عرصة من عرص الثورة و اللي الشباب التونسي عندوا ما يقول في روحو غير الحكومة و المجتمع المدنى متاع سواد السعد يسمعوا و اللي كي نحطوا اليد في اليد نخرجوا مل الحيط اللي داخلين فيه.

و للمعلومة و للنبارة أنا زادة يقال و أني ننتمي للنخبة أما و الله كان جات جلدة الحكاية لاما نبدى نقرقش فيها بسكينة و الدم يشرشر على ماني ناقمة على الانتماء المزبل هذا.

أما *** أمها العشرة لاف و المعذرة على العنف اللفظي و السلام

————————–
بقلم ألفة الرياحي

2 thoughts on “و*** أمها العشرة لاف – الحلقة الثامنة

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s