عل الهامش

في مثل هذا اليوم من السنة الفارطة أطلق كلاب البوليس المجرمون السفاحون الرصاص الحي لأول مرة على المتظاهرين منذ انطلاق تحركات 17 ديسمبر 2010. كان ذلك في معتمدية منزل بوزيان من ولاية سيدي بوزيد و المتظاهرين ما كانوش يتوقعوا امكانية استعمال الكروطوش الحي من قبل كلاب البوليس. أما الكلاب غدروهم و ضربوا الكرطوش على مظاهرة سلمية…

أول الطلقات جات في ظهر شوقي الحيدري (الله يرحموا)، أي نعم في الظهر… الكرطوشة جاتو في النخاع الشوكي و طاح عل البلاصة بحضا سكة القطار و هبطوا عليه البولسية الكلاب يضربوا فيه بالمشطة و الماتراك و هو دمو ينزف… و يكركروا فيه من ساقيه عل الحجر و فوق السكة… المتظاهرين كانو في حالة كر و فر و هاربين على خاطر الكرطوش الحي فاجئهم أما كان فما في المتظاهرين واحد اسمو محمد العماري، صحاب هو و شوقي، ما حبش يخلي شوقي بين أنياب و ساقين كلاب البوليس و يهرب و رجع باش يهزوا. محمد العماري طبّس على شوقي ياخي الكلاب طلقوا عليه النار و جاتو الكرطوشة في قلبو و هو مطبس على شوقي باش يهزوا… محمد العماري ما خلطش حي لمركز الاستعجالي… توفى في الثنية في ايدين خوه… قالوا حلي فلسة الفيستة بش نتنفس… شهّد و استشهد…

بوه مشى يجري للمستوصف و دايخ مل القهرة و كلاب الحاكم شادين السلاح على الطبيب في الباب و مانعينوا بش يدخل أي مجروح و يقولولو كان تدخل أي واحد نفرغوا فيك هاذي…

كلاب الحاكم ما خلاوش عايلة محمد العماري تدفنوا في منزل بوزيان و جبروهم بش يدفنوه 60 كلم بعيد على دارهم و اليوم عايلتوا اللي تعاني الفقر و أمو الكبيرة ما ينجموا يمشيوا يزوروه كان كي يكريو كرهبة بعشرة لاف… و ماكم تعرفوا العشرة لاف…

شوقي الحيدري ما توفاش نهارتها و عدا جمعة في السبيطار… البوليسية السيفيل يعسوا على بيتو في السبيطار و ما نجمت تشوفوا كان مرتو بعد جهد جهيد… شوقي يتكلم بالسيف قاللها دڨدڨوني… على خاطر بخلاف الكرطوشة في النخاع الشوكي شوقي كلا الضرب من كلاب الحاكم للي ما قعدت حتى بلاصة في بدنو لاباس… شوقي الحيدري توفي جمعة مبعد… ولدو ليث عمرو عامين اليوم…

في مثل هذا اليوم من السنة الفارطة… أطلقت أول رصاصات كلاب الحاكم على شوقي الحيدري و سقط أول شهيد لثورة 17 ديسمبر و أسموا محمد العماري… و عايلاتهم يقولوا لليوم : لا نحبوا لا فلوس و لا شي، نحبوا القصاص ملي قتلوهم.

المجد لشهداء الكرامة

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s