و*** أمها العشرة لاف – الحلقة السادسة

صباح الخير

رغم الداء الكبير اللي نحس فيه اليوم و الخشم المسكر و السخانة و العينين الي تدمع و العطصان و الخشم إلي يجري و المفاصل اللي توجع و الصوت اللي هرب… هو في الحقيقة الحالة بدات من نهار الثنين أما ما خببيتش نقول خاطر خفت من النبارة العجم بش يمرجوني بحكاية الأكتاف لعرايا و النبارة العرب بش يشمتوا و يقولوا طاح فيها ربي و شكون يعرف كابتور ديكرون على جملتين من الحلقة الأولى و جملتين من الحلقة الثانية و جملتين من الحلقة هاذي و تولي حكاية عل الفاسبوك و يمهل و لا يهمل و يخلص في الدنيا قبل الاخرة و اللهم لا شماتة… حاسيلو.

رغم الحالة التعيسة متاعي و قبل ما نرحع نموت في فرشي كي الكلبة و كان ربي هز متاعو ملا راحة عل الدمار و الاحباط اللي واحد حاسس بيه هالأيامات، رغم هاذا الكل فما حاجة حبيت نكتب عليها قبل ألا و هي ال400000 موطن شغل الجديد اللي حكى عليهم سي نوردين البحيري البارح.
شوف أنا سي نوردين البحيري نعرفوا و حصلي الشرف و إني نقابلوا و عندي انطباعات باهية عليه كشخص أما مع كل الانطباعات الباهية إلي عندي كي سمعت حكاية الـ400,000 موطن شغل اللي وعد بيهم في عام كشخت. نزلت عل الفلسة بش نعاود نسمع، و قلت بالكشي مل البرودة القوية وذنيا تاخو و تعطي و ما سمعتش مليح أما شي، طلع بالرسمي سي نوردين وعد بـ400,000 موطن شغل.

يا سي نوردين لوكان تسمح بربي كيفاش دجي ها الحكاية؟ على خاطر كان تتفكر و باز تتفكر على خاطر النهضة شاركت مليح في تحركات ديسمبر و جانفي اللي فاتوا راك تعرف شنوة صار في بن علي كي حكى الحكاية هذي في ديسمبر و هو المغبون ما وصلش قال 400000 و حكى على 300000 بركة خرجولوا الكلهم للشارع ڨشعوه و كان ما تتفكرش و قتها بالأمارة خرج الهادي الجيلاني و قال أنا نوعد ديجا بـ 50000 موطن شغل و بدا يدور عل الشركات و يقوللهم اللي عندو أكثر من 50 خدام ملزوم يدخل زوز بطالة من أصحاب الشهادات العليا بالسيف عليه و خرجلنا في التلافز مكستم مريڨل كي عادتو سي الهادي و الشباب يفلم في تونس 7 و يحكي على سياسة التشغيل الناجعة و على الخدم اللي تخلقت بين ليلة و ضحاها. تفكرت سي نوردين ؟

هيا أنا موش بيش نلكلك برشا و نشد انبر و نموت و بن علي كان ديكتاتور و موش شرعي و النهضة جابت الشرعية مل الصندوق و تحلف و تتكتف اللي هي ماهيش مشروع ديكتاتورية و أحنا نسبقوا الخير و ما نحطوش العصا في العجلة… أما بربي يا سي نوردين فهمني.

العام فيه 365 يوم فيهم 48 نهار أحد و لا نقولو 48 نهار جمعة و الجماعة ترتاح بالجمعة و تخدم بالأحد. هيا يقعدولنا 317 يوم اناحيوو منها الأعياد و ما تابع نقولو قعدوا 300 يوم. معناها عندكم « مخطط » باش تخلقوا 1333 موطن شغل في النهار ؟؟؟

هيا نقولوا فما منهم 100000 بش تبعثوهم يخدموا في ليبيا و 50000 متاع الهادي الجيلاني بيش تبعثوهم يخدموا في قطر و فما شكون موش عاجبتوا حكاية قطر العميلة أما الخبزة مرة و أنا حكيت مع شباب بطال قالك نمشي نخدم حتى في اسرائيل. أما هاذي صعيبة بيش تفهمها النخبة على خاطر مزالوا ما فيبالهمش إلي هي ثورة جوع و خبر و كرامة و ماهيش ثورة ديمقراطية و حريات كيما كذبت عليهم هاك السافلة المنافقة أمريكيا. لا علينا.

هيا هاذم تفاهمنا فيهم و لخرين سي نوردين ؟ ياخي دجي اطيش رقم يجفل كيما هذا و تقوللنا تو تشوفوا و بيناتنا الوقت ؟ لا يا سي نوردين راهو موش قطوس في شكارة و اليوم أحنا نعيشوا في كنف الشفافية و المعلومة الحرة. ماو قوللنا بآنا فلوس بش تخلقهم مواطن الشغل هاذي. منين التمويل ؟ على خاطر فيبالي مواطن الشغل باش تتخلق لازمها تمويل و التمويل هذا علم. فما اللي يجي مل القروضات و تخدم الناس توة أما ولادهم و ولاد أولادهم يقعدوا يعانيوو في الديون السيادية للي يعيفوا رواحهم و اسئل عليها اليونان لحكاية هذي و زيد واحد بلاش ديون واحل في السيادة متاع بلادو و ماعندوش حتى النووي بش يعنطز على أمريكيا و البترول هاو حتى فما شكون قاللنا راكم عندكم و كرز ياخي جاء مصدر مسؤول من وزرة سيدهم الباجي قال يكذبوا عليكم و ما عندنا شي. منين التمويل يا سي نوردين ؟ هيا نقولو النهضة و لا الائتلاف بش أهوكة الناس الكل فرد شكارة بالخصوص كي رينا اللي وزارة التشغيل خذاها المؤتمر و ما خذاتهاش النهضة… لا علينا. نقولوا الائتلاف مكبش في السيادة و القروضات من النوع إلي يحطوا التوانسة تحت الصباط ماهيش ماخذتهم. يقعدوا الآداءات و الضرائب. فيبالي ناوين تنقصوا فيهم و القلايل إلي انتخبوا النهضة لأسباب موش دينبة و خذاو الوقت و قراو البرنامج عجبتهم حكاية التنقيص الجبائي و هاو حتى التنبري متاع 60 دينار اللي يخلص في المطار يقولوا تنحى و الفلوس اللي كانت جاية منوا بح ماعاتش فما. باهي تنجم تقولي فما الاقتصاد التضامني اللي مغرومة بيه المغرب أما ماك تعرف التوانسة تليعوا من صندوق التضامن 2626 اللي ڨطعت بفلوسو ليلى الحجامة و تطلع للسماء و تهبط التونسي ماعات يمد حتى فرك لصندوق جاي من تالا الدولة ماك تعرف كلها حكاية ثيقة. شيقعد ؟ تقعد الشركات الأجنبية و الاستثمار الاجنبي متاع هاكيلي لاباس عليهم و يجيوا يستغلوا اليد العاملة التونسية بوبلاش و الحكاية هاذي حكيت فيها البارح و يظهرلي متفاهمين إلي السياسات الاقتصادية متاع بورقيبة و بن علي و بالخصوص في الحكاية هاذي ما حاشتناش بيها. يزي مل الاستعمار. باهي شقعد ؟ ما قعد شي حسب علمي و أنا نستعرف اللي معرفتي محدودة و واحد يعيش و يتعلم و طالب العلم من المهد إلى اللحد و العلم هاذا بيناتنا يهمني.

و لذا عيش سي نوردين بجاه ربي خوذني على قد عقلي و فهمني كيفاش باش تمولوها الحكاية. واحد كي قال بن علي 300000 ألف موطن شغل خرج للشارع و عيط و صاح و كلا الضرب و الغاز و اليوم هاو شادد الدار لحموا ياكل فيه و لا ويلو يعيط و يصيح و لا ويلو يسكت و يستنى و حاسس روحو خاين و جبان. أما هاو بيش نسبقوا الخير و أنا وحدة مع الناس مع الهدنة أما ساعات واحد يخرج من سينتوا و يقول آش من هدنة ؟ و تولي الناس تعيطلوا من جماعة الصفر فاصل و فرنكوفوني و خاين و ما يحبش الخير للبلاد. يا سيدي أنا نحبلها الخير لبلاد هاذي أما بجاه ربي فهمني كيفاش و برة خلي نحبها على قواعد صحيحة البلاد العزيزة الغالية.

و *** أمها العشرة لاف و المعذرة على العنف اللفظي و السلام

—————-
بقلم ألفة الرياحي

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s