و*** أمها العشرة لاف – الحلقة الخامسة

مرحبا بيكم في ما بيناتناش. ضيف البرنامج اليوم الكاتب و الصحافي التونسي توفيق بن بريك إلي عمل ضجة مرة أخرى بجريدتو الجديدة الي تمنع عددها الأول من التسويق. الجريدة للي ما سمعش بالحكاية اسمها « ضد السلطة »
– مرحبا بيك سي توفيق
– مرحبا بيك يالّة و مرحبا بمستمعي شمس ف.م
– سي توفيق الجريدة متاعك تم منعها من الأسواق تعرفشي علاه
– و الله تمنعت على خاطر الشعب التونسي غبي و ما عرفش لشكون يصوّت
– كيفاش سي توفيق تقول على الشعب غبي ؟ فما مستمعين يتغششوا علينا
– أي شبيه أحرار يتغششوا. أنا حرّ في رأيي. شعب غبيّ
– معناها ما تسحبش كلمتك
– لا ما نسحبهاش
– باهي يا سيدي إنت حر و مسؤول على آرائك. سي توفيق لوكان تفسرلنا علاش تظن إلي الشعب غبي حسب رايك ؟
– علا خاطر كيما قتلك الشعب ما عرفش يختار ممثليه. و أنا حياة عمري ضد السلطة و ضد سلطة التنصيب
– كان تفسرلنا سي توفيق انت معناها ضد النهضة معناها عندك انت الاعلامي ما ينجم يخدم كان كي يبدا ضد الحزب الحاكم
– أنا ما نيش اعلامي أولا. شكون قال أنا اعلامي ؟
– مالة سي توفيق ؟ كيفاش تعرف روحك ؟
– و الله في المنظومة متاعي ما نستحقش نعرف بروحي. أنا توفيق بن بريك نفكر و نكتب و الكتابات متاعي كل مرة تاخو فورمة و في الاخر المهم موش أنا شنوة و لا شكون، المهم شنوما أفكاري
– باهي سي توفيق خلينا نحكيوو على أفكارك. كان تفهمنا كيفاش نجموا نكونو ضد السلطة و ماناش ضد النهضة ؟
– هذا تحريف لكلامي آنستي. أنا قلت الي أنا ضد السلطة مهما كانت، النهضة ولا غيرها. أنا ضد القانون و السلطة اللي نحكي عليها تشمل الأحزاب المعارضة و الأحزاب الحاكمة. أنا كل من عندو سلطة نكون ضدوا. أنا مع اللي ما عندهمش سلطة و انعدام السلطة عندهم يكون بصفة قارة.
– معناها سي توفيق كان أنا فهمتك مليح، نجموا نقولوا إلي انت مع نظام الفوضى أو ما يسمى بالأناركية ؟
– و الله تسميه كيما تحب تسميه. أنا مع الناس الي ما عندهمش سلطة قارة
– اللي هوما بناءا علي قلتوا في أول البرنامج أغبياء. ما تشوفش سي توفيق إلي فما تناقض بين تصريحك الأول و بين أنك تحب تحامي عل الناس هاذم
– أسمعني هو راهو الغباء يرجع ال فترة محددة و لفعل محدد و ينجموا ناس يكونوا عندهم ذكاء خارق في حاجات و غباء في حالات أخرى و هذا ما يمنعش و أني نحب الناس هاذم و لا نحامي عليهم و حاجة أخرى راهو المفكر ينجم يكون عندو برشا تناقضات و الانسان من أصلو معمول من تناقضات أما القوة في التفكير و في التحليل هو وقتلي الواحد و رغم كل التناقضات الي يحملها و لا يقولها ينجم يوصل ال نتيجة و لتحليل منطقي
– مالة سي توفيق كان تفسرلنا منطقيا علاش حسب رأيك الناس هذي صوطت ضد مصلحتها ؟
……….

– ألفة قوم ! فيق ! تي فيق الزح ماكلة بعضها في الراديو توفيق بن بريك قال عل الشعب غبي و هاو توة هابطين ريش مع الكرونيكور و المذيعة
– آه ؟ شنوة ؟ كرونيكور ؟ تي لا يا ولدي فماش كرونيكور فاش تخرف
– تي فيق الزح راك تحلم. أخلط اسمع راهم عملوا العار كبشوا في الشعب غبي، فلوق ضحك
– تي فاش تخرف ماو فاتوها الحكاية و وصلوا للتحليل و التناقضات في التفكير و طلع توفيق بن بريك أناركي يظهرلي تي خليني نتبع الحكاية ياسر طيارة نحب نفهم علاش منعولوا جريدتو مل الأسواق
– أوه يا بابا انت حسك حلاتلك الحلمة و لا معدّلة على موجة أخرى. تي هاو قصّوه البرنامج هاهاهاهاهاهاها

……….
إعلام العار
أما *** أمها العشرة لاف و المعذرة على العنف اللفظي و السلام

—————-
بقلم ألفة الرياحي

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s