و*** أمها العشرة لاف – الحلقة الثالثة

هيا يا سيدي الليلة بش نحكي على سيادة وزير الداخلية الموقر إلي قالو راهو معاتش وزير و ولا مستشار و برة أما مزال يتبع الحكومة الموقرة على خاطر الحكومة الموقرة حاشتها بالتجربة الهايلة متاعو و تحب عل الاستمرارية و قالك ما ثبت عليه شي و الكره و الحقد متاع جزء مالتوانسة ماهو إلا مبني على انطباعات و مفماش حجة… بالطبيعة فهمتوا الي أنا نحكي على سيادة وزير الداخلية الموقر الحبيب الصيد.

قبل ما نبدى نعبر و نفرغ قلبي نحب نطلب من جماعة النفاق هاكيلي توة كي شدت النهضة و لا كل شي تضرب بيه النهضة باهي و الي كانت مسكرة فمها كي كان شاددها سيدها الباجي القايد السبسي الصادق العظيم… الجماعة المنافقين ماذابيهم يعاونونا بسكاتهم و السماح في الصرف…

هيا عادا نرجعوا لسي الحبيب الصيد اللي شد بلاصة سي الراجحي. تتفكروه الراجحي و لا نسيتوه ؟ هاكي الراجل إلي قلب الدنيا سافيها على عاليها و قتلي جبد عل الخنار و سمى سي كمال لطيف الموقر في سياق حديث

تفكرتوه ماو كمال لطيف هاكيلي لعب دور البطولة في أقوى قصة حب و هزان طحين لبن علي تي هاكيلي في الحلقة الأولى قالو تتفكر كي كنا ندخلوا على بعضنا عراية… حاسيلو… هو وينو هذاكا الساعة ؟ من نهارة اللي ريناه مصدر بحضا السبسي و الجبالي في سفارة الجزائر ما عاودناش شفناه ؟ تي لا علينا. نرجعوا لسي الحبيب الصيد

سي الحبيب الصيد موش بش نحكي أنا على تاريخو الكبير نخلي بيان قديم متاع المؤتمر من أجل الجمهورية يحكي عليه. هو كي دجي تشوف البيان موش قديم برشة أما كل ما صار قبل تاريخ 23 أكتوبر ولينا نحسوه قديم برشا… هيا الحاسيلو موش بش نفرغ الليلة قلبي عل الحزب الي صوطلوا على خاطر هذي لازمها قعدة و جوّها و وقوف على الأطلال و أم كلثوم و غيرو… لا علينا… سي الحبيب الصيد قالو عليه قيادات المؤتمر في بيان تو تلقاوه اللوطة « أعلنت الحكومة على تسمية الحبيب الصيد الخ الخ الخ و هو منصب لا يحتله إلا تجمعي ملتزم الخ الخ الخ و إنه من الغرابة أن ينصب في منصب حساس كوزارة الداخلية الخ الخ الخ » تي كيما قلتلكم تلقاو البيان كامل اللوطة… ملخص الهدرة المؤتمر طاح مشطة و بونيا و كف في الحبيب الصيد و استماااااااااااااااات في الشتم و النقد و انتوما تعرفوا جماعة السياسة كي يقدموا صدوراتهم للكرطوش… و تعرفوا زادة كرطوش سيدهم الباجي هاكيلي كي يلعج عليها الكل ما عات يسلكها حد و الله كي فموا يطيح بين يديه الناس الكل باقي ترعش منو…
هيا سيدهم الباجي قال أنا نقرر و ما تحكموش فيا شكون نحط وزير و كمال لطيف صاحبي و اللي موش عاجبو أهوكا دبابز الغاز يحلها و يرقد… هو كان جات صارت لحكاية الأيامات هذه راهو الجماعة ما وخروش بما أنو الغاز مقطوع و الشي ولا يتباع في المرشي نوار للكرز متاع الزواولة على خاطر الكرز الصحاح ما يستعملوش الغاز، الشوفاج سونترال بالشوديار و التطييب بالتريسيتي…. لا علينا… هيا يا سيدي شرّف الحبيب الصيد و كي العادة في ديكتاتورية السبسي فما جماعة ما وخروش.
خرجوا نهار 6 ماي ياخي تسيبوا عليهم خلايق ملثمة قيل بولسية بالسكاكن و فوق الموطورات و ضربوا البنات و تعدات الفضايح في التلافز و منهم حتى صحافي حاولو يصخطوه حاشاكم بيجورة على راسو أما قيل منع. هيا كلات بعضها و تكتبت الجوابات المفتوحة و قال جزء مل الشعب ديقاج للصيد أما كي العادة فما جماعة أخرين قالو عليهم يحبوا يدخلوا البلاد في حيط و الردع في المصالح جايز و شلكوا لحكاية كي العادة… و كي دجي تشوف الجماعة هاذم شطرهم يسب في الصيد اليوم على خاطر كي تسب الصيد تضرب النهضة…. آه ؟ شقلتوا ؟ نفاق ؟

هيا تعدات حكاية 6 ماي و الداخلية طلبت السماح و سيدهم السبسي قام يعيط : ديما ما عاجبكم شي تي هاو طلبوا السماح عمركمش ريتو وزير داخلية يعتذر ؟ احمدوا ربي و بلعوا وفامكم خلي نكملوا نخدموا على خلاها.
هيا جات القصبة تلاثة و خرجو الجماهير هاكيلي قالو عليهم كي العادة يحبو يدخلوا لبلاد في حيط و تم استعمار شارع الحبيب بورقيبة و القصبة تقول تسلفوا بولسية مل البرة من كثرة الخير و تسيبوا عل الجماهير كل الكلاب و كي العادة سيبوا الخلايق المقنعة و كان تتفكروا كانو مجمل البولسية فروخ صغار شطرهم مزال يقرى و كذبو عليهم قالولهم يحبو يحرقوا الوزارة لولا الخ الخ الخ و كي تحكي معاهم و تسمي الديماسي و العجيمي عينيهم ادمع… لا علينا… هيا نهارتها 15 جويلية و بالأمارة الكلاب دخلوا للجوامع و عملوا العار للي الفلسطنيين على فايسبوك خذاو الفيديوات متاع القصبة و هبطوهم في باجات ضد الاستعمار الصهيوني و كتبوا نعم هذا يحصل في تونس و قالو على كلاب السبسي إلي هوما كلاب الصيد صهاينة. لا علينا.
و تعاود فيلم الرعب نهار 15 أوت وقتلي خرجوا لحرار يناديوو باستقلالية القضاء في باب بنات و بالأمارة نهارتها عبد السلام جراد خرّج مسيرة أخرى في نهج محمد الخامس معاه الأحزاب الي معظمها خسرت في الانتخابات و التلافز تصور فيهم و الأحرار تاكل في الغاز و المتراك في النهج لاخر… حاسيلو لا علينا.
هيا هذا الكل كان في عهد الوزير الموقر السيد لحبيب الصيد أما رد بالك تقول حجة و لا حاجة… هو مجرد انطباع و برة.
نحب نسأل رئيس الحكومة الموقر و رئيس الجمهورية الموقر يعاونونيشي بش نفهم كلمة نفاق ؟ على خاطر في بالي كي الحكومة الثورية تخلي الصيد في الحكومة هذا هو النفاق و الله أعلم.
أما بالكشي فما شكون كبارات في الداخلية أكبر مالشعب و أكبر من الجبالي و المرزوقي و أكبر مل الأحرار الكل قالو لوكان يتنحى الصيد و تولي فيها محاسبة نشعلوا البلاد و نقلبوها. كان هكا الحكاية لواش تستبلهوا فينا ماو قولوها برجلة و يزيوو من النفاق.
أكهو نقعدوا أحنا كل مرة في عوض نتلهاو بالمشاكل الصحاح و الاقتصاد و الفساد و السرقة و البطالة و نتلهاو نفكروا فيكم بجرحى الثورة اللي بين الحياة و الموت و دم الشهداء اللي لتوة لا خلص نقعدوا ماشين جايين نعيطوا ديقاج و نلكلكوا في فرد حكاية.

و *** أمها العشرة لاف و المعذرة على العنف اللفظي و السلام.

—————-
بقلم ألفة الرياحي

Laisser un commentaire

Entrez vos coordonnées ci-dessous ou cliquez sur une icône pour vous connecter:

Logo WordPress.com

Vous commentez à l'aide de votre compte WordPress.com. Déconnexion / Changer )

Image Twitter

Vous commentez à l'aide de votre compte Twitter. Déconnexion / Changer )

Photo Facebook

Vous commentez à l'aide de votre compte Facebook. Déconnexion / Changer )

Photo Google+

Vous commentez à l'aide de votre compte Google+. Déconnexion / Changer )

Connexion à %s