هيا قلنا السلام يا جماعة
بعد غياب طويل لمسلسل "و *** أمها العشرة لاف" قررت اليوم بش نرجع نكتب حويجة بلوغتي الأم اللي نحبها و نموت عليها و ما نعرف نخرّج اللي في الجواجي كان بيها. برشا ناس كتبولي يسألوا علاش وقفت الكتيبة متاع المسلسل اللي كيفو كيفي، لا يصلح لا للسوق لا للصندوق… أما يصلح… في الحقيقة وقّفت على خاطر تعديت بحالة احباط كبيرة ما ينفعش معاها الكلام و مبعد أصلي النخبوي المعفن رجع غلب و رجعت نكتب بلغة أمي العجمية متاع أيتام فرنسا و فرد وقت تعديت بمرحلة تمرد كبيرة على أمي العربية اللي نفخولي راسي أولادها الأخرين… لا علينا و خلي ندخل في الرسمي
هيا اليوم قلت نكتب حويجة على الاشاعات اللي قاعدة تدور في البلاد عندها مديدة و اللي ما تنجمش تكتب عليها بلغة أخرى. لغتي الأم اللي هي اللغة الدارجة لغة التعبير المجازي اللي ما تلقى تصاورو في حتى لغة أخرى، لغة الشتم و السبان، لغة التفدليك و البلادة، لغة ضربان اللغة و التبهنيس، و لغة الحكايات في التراكن و الاشاعات.
الاشاعات اللي يقال اللي هي تحب تدخل البلاد في حيط و لكن يقال زادة اللي ما فماش دخان بلاش نار. و واحد قداش بش يقعد يبربش و يثبت وحدو ؟ ظاهرلي بش ترصيلو يستنى في ويكيلكس متاع عام 2035 ان شاء الله…
واحد بش يثبت مل الاشاعات اللي تدور في البلاد لازموا فريق محترم يخدم معاه صباح و ليل و اندساس و فلوس و تليفونات و غيرو… لازموا حويجة كيما لجنة بودربالة مثلا اللي آمر بتأسيسها "المخلوع" (؟) بن علي نهار 12 جانفي 2011 أما قالك أبدا كان يستعرف بها الحكاية هاذي بودربالة و قالك بن علي ما عندو في السوق ما يذوق و اللجنة تعملت نهار 17 جانفي… لا علينا
هيا سي بودربالة و جماعتو خدموا على رواحهم بحرية و ضمير و استماااااااااااتوا أكثر من عام و الشعب التونسي يستنى في الحقائق و مسكين ما فيبالوش اللي اللجنة لجنة طمس حقائق و جدّت عليه الحكاية كيما جدت عليه حكاية الثورة و الكرامة و السيادة الخ…. ملاحظة : كان تحبوا تعرفوا الباقي متاع الليستة عليكم بالمايلوات اللي سرقوهم أنونيموس من المايل متاع الجبالي تو تلقاوو المفردات الهامة اللي وصاو عليهم وزرة النهضة بش يقعدوا يعاودوا فيها صباحا مساءا و يوم الأحد… وفات الملاحظة
نتوكل توة على ربي و النبي مولايا و نبدا نسيب في الاشاعات اللي سامعة بيهم و اللي ما نجمشتش نثبت منهم و والله لاني حابة ندخل البلاد في حيط… نحب نهدر شوية و برة
الاشاعة 1 : قالك القناصة موش اشاعة و فما منهم شكون أجانب و ينتميو لأجهزة مخابراتية أجنبية و منهم زادة شكون مكري، مرتزقة معناها، و الله أعلم شكون اللي كراهم. فيهم عل القليلة مرا كيما المرا اللي يحكيو عليها عائلات الشهداء متاع القصرين و اللي تضربت و هزها الجيش لصبيطار ولا كلينيك في صفاقس و من غادي اختفات. و قالك المرا هاذي تقنص فيهم من فوق السطح و تشطح بعد ما تمس واحد و مبعد تعمل للمتظاهرين اشارة بيدها و تقولهم تفضلوا قدموا. بالطبيعة لجنة طمس الحقائق قالت اللي وزارة الداخلية تحلف و تتكتف اللي ما عندهمش نساء يخدموا بالسلاح و لذا فاللجنة تنقل الشهادات بكل احتراز. هو راهو اللجنة حشمت من أحرار الشعب التونسي و لا راهي قالت اللي المرا هاذي من خلق المخيلة الجماعية و ليس لها وجود في الواقع أصلا اما أهوكة حشموا و احترزوا
ديما في سياق الاشاعة الأولى قالك صحافي فرنساوي يموت عل الاشاعات و يكتب في صحيفة فرنسية معروفة برشا برشا بالاشاعات اللي تسيب فيهم و اللي هيا صحيفة Le monde diplomatique
قالك اللي هو نهار 13 جانفي 2011 مع العشرة غير ربع متاع الصباح شاف في مطار تونس قرطاج حكاية 10 رجال هزين فاليجات مستطيلة متاع سلاح قنص و فما واحد كولونال فرنساوي أنتريتي يستنى في صحابو يخدمو معاه في الطابق السفلي متاع الوصول (أما هو انتريتي راهو) جايين بش يهزوه و يترشف في قهيوة مع الصحافي… كي شاف ها الـ10 رجال شاقين المطار و طلعوا في 3 كراهب 4*4 لونهم رمادي و بلارهم فومي تبسم و قالو : « هاذم مرتزقة من افريقا الجنوبية و يخلصوا بين 1000 و 1500 دولار في النهار"
أما بالطبيعة لحكاية هذي ما فما منها حتى شي و الصحافي كان يمشي يقابل بودربالة و لا واحد من نقابة الأمن و لا مل الحكومة تو يخلصولوا حق طبيب أعصاب بش يبرى مل التهلويس
اللي زادة شاف في المطار أشخاص بنفس المواصفات نهار 16 جانفي بين الـ11 متاع الصباح و نص النهار هازين الفاليجات المستطيلة هيا بيدها تقول فاليجات متاع كمنجة أما هوما موش متاع كمنجا و يلوجوا على طيارة بش يروحوا إلى أين لا نعلم و يعلمون … اللي شافهم يمشي كيف كيف هو يطلب تمويل علاجو عند طبيب عصاب بش تتنحالو الهلوسة
و اللي شاف الكراهب هوما بيدهم قدام جييون متاع مروان مبروك نهار 15 جانفي و يحلف و يتكتف اللي الماتريكول متاع الكرهبة أجنبي و يحلف و يتكتف اللي شاف هبطو منهم رجال مقنعين مشاو حلوا المركب التجاري و فصعوا من غير ما يهزوا شي… اللي شافهم ما يستحقش يطلب تمويل علاجو عند طبيب نفسي خاطر فيبالي بيه فات عليه الفوت و ماعتش معاه دواء و هبل… و راهو مسكين مشى حكى لحكاية في مركز الشرطة و من غير ما نحكي شنوة جاوبو رئيس المركز و كيفاش عدا الأيامات اللي بعد… أما مسكين مهبول و تلفاه هذا الكل جايبو مل الحيط و من مخيلتوا الخلاقة…
فما زادة هاكيلي جاو يصطادوا في الحلوف في زك الثورة و شدوهم الأحرار في وسط العاصمة طلعوا مساكن صيادة و برة و ما فيبالهومش اللي البلاد ماكلة بعضها و أنا بيني و بين روحي نتصور اللي عداو قرابة شهر في جبل كيما جماعة سليمان، لا تلفزة لا جرايد لا تليفون و زيد ما عندهمش شكون يطلعلهم الخبز فوق السطح… سامحوني حبيت نقول فوق الجبل… و لذا ما فيبالهم بشي… كملوا المصيد قالوا هيا نروحوا و كي ركبوا في التاكسي شلقوا اللي تونس فيها ثورة….
هاذا في ما يخص اشاعة القناصة اللي تقول اللي القناصة ماهمش اشاعة و اللي تقول اللي منهم مرتزقة أجانب و استخبارات اجنبية و عالم و يا سلام… و مزالوا الاشاعات تبارك الله… الخير و البركة… أما توة لازمني نخرج نفطر و نقطع و نريش و نعبي شكاير اشاعات اللي هوما موش اشاعات… و اللي يعجبك الاشاعات تحب الناس الكل بالتونسي و القاوري و الزوالي و الكرزة و المسلم و الكافر… و عما قريب نرجع نحكيلكم على اشاعات أخرى
و *** أمها العشرة لاف و المعذرة على العنف اللفظي و السلام
——–
بقلم ألفة الرياحي
.
Très adorable Olfa … J’aime beaucoup ton style de rédaction
)))
Ravie que ça te plaise Adel
JE SUIS AVEC TOI , LA VÉRITÉ A BESOIN DE BEAUCOUP DE SACRIFICE KOL 7AJA JDIDA TA9A LIHA BARCHA MOU3ARDINE MICH TO5ROJ MIL SYSTEME RAHOU S3IB BARCHA RABBI IKOUN M3AK JE SUIS FIER DE TOI ET DE CETTE NOUVELLE TENDANCE DS LAPRESS
bien dit et écrit
و أنا بيني و بين روحي نتصور اللي عداو قرابة شهر في جبل كيما جماعة سليمان، لا تلفزة لا جرايد لا تليفون و زيد ما عندهمش شكون يطلعلهم الخبز فوق السطح… سامحوني حبيت نقول فوق الجبل… و لذا ما فيبالهم بشي… كملوا المصيد قالوا هيا نروحوا و كي ركبوا في التاكسي شلقوا اللي تونس فيها ثورة….
=============> hahaha; c’est le meilleur passage!
#J’adddOre!
Ma a7lech mi dérja
مازلت نستنى في الحلقة العاشرة من **** امها العشرة لاف و ***** بوها الورقة بوخمسين ….